Nos-avons lî dins l’ Nouvelle Gazette di l’ lundi 29 janviè:

Èl brassène

On-a toudis brassè a l’Union, ô plin mitan d’ Djumèt; i-gn-a cint cénquante ans qu’on brasse lôvô èt qu’ l’odeûr du brassin qui travaye fét toûrnér l’ tièsse dès Djum’tîs.
Oyi, c’èst da yeûs´ tèrtous, ç’ brassène la; c’èst leû stoumac´ qui groûle, c’èst leû keûr qui toque dins lès bèlès cûves dè cwîve èt lès miles di boutâyes avè l’ bîre didins, c’èst yeûs´ tèrtous qui lès-èvoy’nut pa t’t-avô l’ Bèljique, pa t’t-avô lès cabarèts d’ l’Eûrope ètîre, a lès céns qui buv’nut vol’tî èl boune bîre di Djumèt. Èl bîre di Djumèt avè l’iskime qui chime ô d’zeûs dès vères èt qui vos fét ène moustatche di pléji quand vos l’ buvèz. L’iskime di leû bîre, c’èst come Djumèt èt lès Djum’tîs qui vos racont’nut leûs prôtes èt leûs souv’nances; c’èst come Ègne èt lès Sarasins qui vos racont’nut leûs vîyès quéntes et leû-n-istwère; c’èst l’ Mad’lène, tous lès tch’vôs, tous lès sôdârds an trin d’ toûrnér ô grand solia du mwès d’ jwiyèt. L’iskime di leû bîre, c’èst l’ cène qui tchante l’istwêre di no payis!
Èyèt, bardaf! V’la tout d’in côp qu’on vént vos dîre qui l’ bîre, c’èst fini, qu’i-gn-âra pus pont d’iskime pou nos fé rîre, pou nos fé toûrnér no tièsse èt nos fé balancî! V’la qu’on vént nos dîre qui l’ brassène, on va l’ sèrér, qui l’èspèrance dès djoûs mèyeûs dins no Nwâr Payis, qui l’iskime di no fièrtè, on va souflér d’ssus, on va l’ distinde come on-a d’dja distindu tant èt tant d’ boutiques, di vèr’rîyes, di tchèrbonâdjes èt qu’on-âra co ène bètchèye di rûjes di pus pou t’nu no tièsse èrdrèssîye...
Èt tout çoula pouqwè?
On-aveut fét dès toutes nouvèlès cûves, on-aveut tout r’mètu a noû pou co continuwér dès dîjènes èt dès dîjènes d’anéyes.
Parèt qu’on n’ bwèt pus ostant d’ bîre, qui ça vos fét grochi, qui ça n’ vôt rén pou min.nér vo-n-ôto.
Èyèt l’iskime qui v’neut piquî a vos néz èt qui vos fèyeut rîre, èt bén parèt qu’on n’ poûra pit-ète bén râde pus rîre non pus!
Sâcrè gârce di nouvia sièke! Sâcrè gârce di nouvèle èconomîye! A ç’te eûre, lès céns qu’i fôt fé rîre, c’èst lès-aksionéres. Éyèt c’è-st-an rimplichant leû boûse èt nén an rimplichant leû vêre!

Deûs coquias d’ALWaC
(ç’ côp ci, ç’asteut Louis Marcelle èyèt Pierre Arcq)