Dispûs qu’il-a avalè sès moules câréyes sins-astrukî, il-a co div’nu pus simpa, Lèyon, l’ome di Goch’lî! C’èst l’ vré qu’i travayeut branmint, qu’i f’yeut s’ possibe pou d’meurér stampè sins ridér mès dès pias d’ banane, i lyi d’a tcheû di tous costès, dès roudjes, dès bleûsès èt dès vèrtes; èt, ravisèz come ça va, alons, pou tout fini, c’èst lès pias d’oranje du Raviseû qui l’ont fé tchér´ su s’ cu.
Pont d’ chance pou Lèyon mès come tous lès grands champiyons, il-èst capâbe di pièrde avè l’ sourîre adon qu’on dè wèt d’s-ôtes qui grign’nut dès dints, lès-ancyins tout pwissants èt qu’is sont a ç’te eûre dins lès céns qu’on roublîye.
Fôt dîre ètou qu’èl champiyon, pour li djouwér al bale, on lyi cherveut dès bales câréyes al tach’lète èyèt qu’ pou dalér a vélo, i faleut qu’i s’arindje avou in pèdalièr èt in candj’mint d’ vitèsse a dints cârès. Èl pôve maleûreûs Tchot, i d’veut pèdalér dins-in Payis Nwâr èyu ç’ qu’i-gn-a branmint dès léds tiènes a grimpyî èt èyu ç’ qui tout toûrne di triviès su dès roûlètes câréyes dispûs d’dja saquants-anéyes.
In fameûs tchinis´! Lès djins qui d’meur’nut dins lès môjos d’ citè, on l’s-aveut pris pou dès bèdots qu’ lès grands glorieûs pouvun´ tonde tous lès-ans. Lès gros godayeûs d’ l’ICDI dalun´ fé bombance avou lès liârds qu’is rapèchun´ woûrs dès batch a bèrnate. Lès finances pou rarindjî lès-èscoles, on d’aveu yeû dandji ène bètchîye pus lon, a Carcassone!
Ça fét d’dja branmint d’s-afêres a r’mète d’alure su dès bounès roûlètes an ratindant di r’touchî lès picayons cârès d’ l’ISPPC, èvolès a lès «Bahamas».
C’èst pou çoula qu’èl malén Djan-Djâques a èmantchi in nouvia Coléje avou l’ mitan d’ couméres; on s’ra d’dja bén seûr d’awè ène saqui pou fé lès bidons mès vos dalèz vîr èl djeu quand èles vont tèrtoutes couminchî a skeûre les sayas; èl pwèy va volér!
Mès çu qu’ tous lès djins vourun´ bén, c’èst vîr qu’i-gn-a ène saqwè qui boudje a Châlèrwè, nén dins cénq ans, mès tout d’ swite, èt qu’on r’couminche a travayî sérieûs’mint pa d’zous l’ bourdon d’ l’Ôtèl di Vile, sins mète dès brokes câréyes dins l’ viole du Coléje! Èl tins passè èst woute; i fôt lèyî fé lès jûjes mès mès-omes, is-ont toudis bén l’ tins. I n’ fôt nén qu’on ratinde après yeûs´ pou r’troussî sès manches èt s’èr’mète a fé s’ bouye.
An ratindant, on-a r’mètu ène boune broke câréye dins l’ocha dèl cwisse di no Rwè Albèrt èt on lyi souwéte qu’i fuche rad’mint su pîd èt qu’i r’pèrdîche sès pléds come i fôt. Mès a s’ môjone, fôra qu’on-arète di scurér lès plantchîs!